Пошта воведе е-трговија – Од 8ми Март онлајн нарачки со испорака до саканата адреса

Од утре, преку Пошта на Македонија започнува е-трговија, односно можноста секој заинтересиран граѓанин да направи онлајн нарачка за подарок кој ќе се испорачува на саканата адреса за време и по повод 8 Март, Меѓународниот ден на жената.

Процедурата е едноставна, брза и безбедна. Сите заинтересирани граѓани за користење на оваа услуга треба да ја посетат официјалната веб страница на Пошта: www.posta.com.mk. Потоа одбираат еден или повеќе од понудените подароци, внесуваат свои, како и контакт-податоци, вклучително и адресата каде сакаат да биде доставен подарокот. Дополнително, постои и можност за пишување на персонализирана порака која во оргинална форма ќе се отпечати и достави до примачот, информираат од АД „Пошта на Македонија”.

Наплатата од Пошта е целосно безбедна, а се одвива преку онлајн системот на деловниот партнер Халкбанк. Цената на достава за подароците е унифицирана и изнесува 80 денари, а важи за територијата на целата држава, стои во сооптешнието.

Ова е првпат националната Пошта да овозможува ваква опција, а целта и фокусот и во следниот период ќе биде дигитализацијата на целокупниот процес на услуги, каде е-трговијата ќе зазема еден од централните улоги.

Процесот на подобрување на работењето на Пошта во иднина сè повеќе ќе се заснова на користењето на современи дигитални алатки, како и преку засилена соработка со поштите од регионот, но и преку меѓународната поддршка која како компанија ја очекуваме – велат од АД „Пошта на Македонија”.