После два дена пад, азиските индекси во зелено

Азиските берзи во четврток пораснаа, после два дена пад, додека цените на нафтата паѓаа трет ден по ред.

Индексот на акции во Азија и Пацифик MSCI, со исклучок на јапонскиот, се зголеми за 0,4 проценти околу 7:00 часот, неутрализирајќи дел од вчерашната загуба од 0,9 проценти.

На берзата во Токио, индексот Никеи скокна за повеќе од 1,5 процент, додека цените на акциите во Сингапур, Австралија, Хонг Конг и Јужна Кореја пораснаа помеѓу 0,1 и 0,6 проценти. Во Шангај, пак, тие малку паднаа.

Азиските инвеститори беа охрабрени од вчерашниот пораст на индексите на акции на Волстрит, по дводневниот пад. Ова во голема мера се должи на подобро-од-очекуваните квартални деловни резултати на американските компании.

Сега, аналитичарите во анкетата на Ројтерс проценуваат дека заработката на компаниите во индексот S&P 500 пораснала за 31 процент во изминатиот квартал во споредба со истиот период минатата година, додека пред две недели тие очекуваа раст од околу 25 проценти.