Поголема улога на жените во управувањето – зајакнува соработката меѓу АСО и WOBA

Поголема застапеност на жените во управувачките структури, унапредување на корпоративното управување и зајакнување на финансиската едукација беа во фокусот на средбата меѓу претседателката на Советот на Агенцијата за супервизија на осигурување (АСО), Ели Дракуловска, и амбасадорката за Македонија на регионалната иницијатива Women on Boards Adria (WOBA), Тања Михајловска Димитриевска.

На средбата било разговарано за можностите за натамошно проширување на соработката, размена на искуства и заеднички активности насочени кон поголема инклузивност во процесите на носење одлуки, особено во финансискиот сектор.

Дракуловска истакнала дека доброто корпоративно управување и разновидноста во раководните структури се важни предуслови за долгорочен и одржлив развој.

„Веруваме дека подобрувањето на корпоративното управување и поттикнувањето поголема инклузивност во управувачките структури се клучни за одржливиот развој на секторот. Отворени сме за соработка што ќе придонесе за зајакнување на професионалните стандарди и довербата во институциите“, нагласила Дракуловска.

Од WOBA посочуваат дека поголемото учество на жените во управните и надзорните тела не е само прашање на еднакви можности, туку и фактор што позитивно влијае врз деловните резултати и квалитетот на корпоративното управување.

„Поголемата застапеност на жените во процесите на донесување одлуки не е само прашање на еднаквост, туку и фактор за подобри деловни резултати. Преку соработка со АСО имаме можност да придонесеме за создавање поинклузивен и одржлив финансиски сектор“, изјавила Михајловска Димитриевска

Women on Boards Adria е регионална иницијатива која работи на зголемување на учеството на жените во управувачките и надзорните структури преку обуки, менторски програми и поддршка на политики усогласени со европските стандарди за инклузивно лидерство.