ПОДАРЕЖЛИВА Е ОД БЕЗОС: Мекензи Скот донирала 8,8 милијарди УСД за две години

Мекензи Скот досега во текот на животот донирала четири пати повеќе пари од нејзиниот поранешен сопруг.

Откако се разведе од основачот на Амазон, Џеф Безос во 2019 година, 51-годишната Мекензи Скот стана еден од најголемите филантропи во светот.

За помалку од две години таа донирала вкупно 8,8 милијарди долари на повеќе од 780 организации, според Форбс, кој минатата година ја прогласи за најмоќна жена во светот.

Тоа значи дека дала четири пати повеќе пари отколку што донирал нејзиниот поранешен сопруг за време на неговиот живот. Само во февруари годинава девет организации објавија дека ги добиле парите на Мекензи Скот во вкупен износ од 264,5 милиони долари.

Донациите на Мекензи Скот доаѓаат во форма на неограничени грантови, што значи дека непрофитните организации можат да трошат пари како што сакаат, а не да исполнуваат одредени програми. Иако овој тип на давање не е нов, Скот се фокусира на филантропијата заснована на доверба, која се стреми да се справи со нерамнотежата на моќта помеѓу богатите финансиери и непрофитните организации.

Она што се разликува од некои претходни донации, Скот не ги објави јавно, како што правеше во минатото. Таа неодамна изјави дека медиумите премногу се фокусираат на неа, а не на групите на кои им дава пари. Сепак, таа најави дека оваа година ќе отвори веб-страница со база на податоци за грантови што може да се пребарува.