Побрзо да се најде инвеститор и работа за сите – бараат работниците од „Еуроникел индустри“

Работниците од „Еуроникел индустри” не прифаќаат само стотина од нив да ја одржуваат печката во фабриката, како што предложила банката доверител и нов сопственик на комбинатот. Бараат побрзо да се најде инвеститор и сите да останат на работа, изјави претседателот на Синдикатот на индустрија, енергетика и рударство, Игор Герасов, за МИА, повторно укажувајќи на неизвесноста за околу 800 работници и многу други соработници на компанијата.

„Нашиот став е веќе познат, што побрзо да се најде инвеститор, за фабриката да може да продолжи да работи. Банката доверител ја активираше хипотекарната гаранција, сега таа е сопственик на комбинатот. Странските газди веќе не раководат со фабриката, работниците се оставени сами на себе. Предлог на банката беше да останат сто луѓе на работа да ја одржуваат печката за просечни плати, додека да се најде инвеститор“, појасни Герасов.

Воедно, нагласи дека сите работници апелираат до банката да се изнајде решение и побрзо да дојде инвеститор.

„Како што сум информиран од банката, во финални разговори се со некој инвеститор и се надеваат на потпишување договор што е можно побрзо, за да може компанијата да продолжи со работа“, вели Герасов, додавајќи дека работниците немаат земено три плати.

Некогашниот кавадаречки гигант „Фени“ не работи веќе неколку месеци. Во тој период период вработените протестираа во повеќе наврати, со барање да не се дозволи затворање на фабриката, која со децении наназад е од огромна важност и за регионалната и за македонската економија.