По 10 години производство – „Реплек“ извезе производи од медицински канабис во ЕУ

Реплек бележи една деценија континуиран развој во сегментот на производи на база на медицински канабис, период во кој компанијата не само што го воспостави домашното производство, туку и успеа да го позиционира својот бренд на еден од најстрогите пазари во Европа. Јубилејот доаѓа со значаен исчекор – реализација на првиот извоз на овие производи во Европската унија.

Во изминатите десет години компанијата ја гради оваа линија како високо специјализиран фармацевтски сегмент, заснован на строги стандарди, контроли и долгогодишна експертиза во фармацевтското производство. Таквиот пристап, како што велат од компанијата, е клучен за обезбедување конзистентен квалитет и безбедност кај производи добиени од растителна суровина.

Централен момент во јубилејната година е првиот извоз на производи од медицински канабис на пазарот на Европската унија, што е од големо значење за компанијата, но и за домашната фармацевтска индустрија.

„Кога пред 10 години стартувавме со овој фармацевтски сегмент, пазарот во земјава реагираше со скептицизам. Бевме пионери во ова поле, и на македонскиот, исто како и на регионалниот пазар. Решивме да бидеме истрајни и напорно да работиме во реализацијата на оваа идеја, а од сегашна перспектива можеме да кажеме дека нашата одлука беше исправна, што се докажа и со успешно реализираниот извоз на пазарот на Европската Унија. За пласман на овие производи има сериозен потенцијал, бидејќи глобалниот пазар на производи од канабис продолжува да бележи силен раст, а потенцијалот за националната економија е голем и треба да биде искористен“, посочи генералниот директор на Реплек, Душан Пецовски.

Како дел од стратегијата за транспарентност и едукација, компанијата во ноември минатата година го отвори КА-информативниот центар, прв од ваков вид во земјата, посветен на информирање за производите на база на медицински канабис. Тој функционира како подружница на Реплек и служи како комуникациска платформа меѓу компанијата, стручната јавност и корисниците, со цел унапредување на информираноста и намалување на стереотипите.

КА-информативниот центар има значајна улога во надминување на стереотипите поврзани со медицински канабис и е точка на доверба меѓу компанијата, потрошувачите и стручната јавност.

Производството на оваа линија се базира на современи технологии, вклучително и суперкритична CO₂ екстракција, која овозможува висока прецизност, стабилност и квалитет на екстрактите. Компанијата користи индустриска опрема од реномирани европски производители, при што континуираните инвестиции и стручниот кадар се посочуваат како клучни за стабилен и проверен производствен процес.

Портфолиото на Реплек во овој сегмент опфаќа ЦБД масла, козметика со медицински канабис, како и производи со ЦБД и ТХЦ наменети како дополнителна терапија кај одредени заболувања, во согласност со регулативите.

Со децениското искуство, проширеното портфолио и првиот извоз во ЕУ, Реплек ја позиционира државата на мапата на современата и одговорна фармацевтска индустрија на медицински канабис.