СМРТНОСТ КАЈ ПЕНЗИОНЕРИТЕ: Лани починале речиси 50% повеќе пензионери отколку во предпандемиската 2019 година

На прашањето колку пандемијата ја зголеми смртноста кај пензионерите, одговор побаравме во бројките на Фондот за пензиско и инвалидско осигурување. Во 2017 и во 2018 година, бројот на починатите пензионери бил сличен, околу 14.000, но во 2019 година (предпандемиска), бројот на починатите пензионери се зголемил за над 1.000. Пандемијата беше прогласена на 11 март 2020 година и таа година починаа 17.555 пенизонери, дури 2.244 повеќе отколку во претходната година. Но следната година, односно 2021 година ќе биде забележана со уште поцрна статистика, со дури 21.829 починати пензионери, што е зголемување од речиси 50 проценти во однос на предпандемиската 2019 година, или уште повеќе ако се спореди со 2017, односно 2018 година.

Податците за смртноста на пензионерите покажуват и дека во „нормално време“, кога немало пандемија, пензионерите најранливи биле во зимските месеци. Смртноста е значајно поголема во декември, јануари и февруари и во март, а во април почнува да се намалува.

Секако, во време на пандемија, смртноста е диктирана од темпото на пандемијата. Може да се види дека кај нас, ефектите од глобалната пандемија не се пресликале веднаш на почетокот, туку растот на смртните случаи е евидентен од јули 2020 година. Врвот на смртноста кај пензионерите е евидентиран во јануари 2021 година кога за еден месец починале 2.486 пензионери.