„Пелистерка“ со газирана формула: Помала продажба, тројно поголем профит

Намалени приходи за 5,57 отсто, за 6,65 проценти пониски трошоци и добивка со раст од 321,28 насто. Тоа се резултатите од минатогодишното работење на „Пелистерка“. Од компанијата образложени со: „има незначително намалување на приходите од основната дејност“; „расходите во споредба со минатата година се намалени, а тоа се должи на фактот што се намалени и приходите“; „финансискиот резултат е зголемен во споредба со минатата година“.

Бројките од билансот на успех покауваат дека „Пелистерка“ лани остварила оперативни приходи од 483.779 илјади денари или 7,8 милиони евра. За половина милион евра помалку во однос на претходната 2023 година. Приходите од продажбата  се пониски за 2,88 проценти и се на ниво од 7,84 милиони евра.

Продажбата на домашниот пазар опаднала за 2,9 отсто. Преклани водите и соковите обезбедиле прилив од нешто над осум милиони евра, а во 2024 – 482.427 илјади, односно 7,84 милиони евра. Како што посочуваат од компанијата „извозот е зголемен“. Има придонес од 92 илјади денари.

Залихи на готови производи на почетокот од годината биле во вредност од 566,8 илјади евра, а на крајот од 2024 – 645,3 илјади евра.

А, оперативните расходи од 7,8 милиони евра во 2023, во текот на 2024 година се скратени на 7,3 милиони евра.

Што се однесува до крајниот резултат, „Пелистерка“ има добивка од 18.549.000 денари или 301,6 илјади евра. За споредба, 2023 година била заокружена со профит 4.403.000 денари, односно 71,6 илјади евра.

Исполнувањето на планот за производство и продажба е на задоволително ниво, посочуваат од „Пелистерка“.

Компанијата има издадено 50.180 хартии од вредност. Последниве 52 недели, покажуваат берзанските податоци, имало три тргувања. Според последното од 19 март годинава, просечната цена за акција е 2.619 денари