„Пекабеско“ со приходи од близу 100 милиони евра

Производството на сувомесни производи и дистрибуцијата на храна и цигари лани на „Пекабеско“ му обезбедиле приливи од 97 милиони евра. Добивката е во износ од 2,9 милиони евра, поради тоа што трошоците на компанијата се високи – 93,8 милиони евра.

Консолидираните приходи се за осум проценти поголеми споредено со претходната 2023 година, а расходите за седум насто. Во структурата на вкупните приходи најголемо учество од 98,7 отсто имаат приливите остварени со продажба на готови производи, стоки и услуги, посочуваат од „Пекабеско“. Притоа, од извозот се инкасирани 12,3 милиони евра. Овој резултат се должи на деветпроцентниот раст забележан кај извозната активност.

Во текот на минатата година реализирани се и инвестиции од 1,6 милиони евра. Главните вложувања се направени во градежни објекти, производствена, транспортна и компјутерска опрема.

Во образложението за постигнатите резултати од компанијата наведуваат дека за 12 проценти е зголемена нивната солгорочна консолидирана задолженост, која на крајот од 2024 е во износ од 3,8 милион и евра.

Производите на „Пекабеско“, чие годишно производство достигнува девет илјади тони, ги има во регионот – Србија, Босна и Херцеговина, Косово и Црна Гора, но и на европските пазари. Од 2018 година компанијата е на листата одобрени објекти на Европската комисија за извоз на храна од Македонија.