Граѓаните им ги доверуваат своите пари на банките – 7 милијарди евра во депозити

Во услови на најголема економска криза предизвикана од пандемијата Ковид 19, според статистиката на Народната банка за 2020 година македонските граѓани или штеделе, или се задолжувале.

Вкупните депозити до декември лани достигнаа 7 милијарди евра, од кои 4 милијарди 637 милиони евра се заштеди на граѓаните во банките. А само една година претходно, во 2019 година на штедните книшки на граѓаните имало 4 милијарди 432 милиони евра или 205 милиони евра помалку.

И компаниите штеделе. Гледајќи за истиот период, кај нив имало плус 183 милиони евра во однос на 2019.

Трендот на раст на депозитите го регистрираше и Народната банка. Само во декември депозитите на домаќинствата порасанале за 2,3 проценти во однос на претходниот месец.

„На годишна основа, депозитниот раст изнесува 4,6% и целосно се должи на повисоките депозитни пари и краткорочни депозити во странска валута, при забележан пад кај останатите компоненти.“- НБРМ.

Но кој штеди и во услови на криза?! Податоците на Фондот за осигурување на депозити, за првите шест месеци лани покажаа дека на книшките на 28. 573 граѓани се речиси половината од вкупните депозити на сите граѓани. Тие во банка имаат речиси 2,2 милијарди евра. Парите кои ги чуваат во банка се над 30.000 евра – износ кој не е осигуран доколку дојде ризичен настан кај некоја банка.

Податоците на Народната банка покажуваат и дека за време на пандемијата граѓаните се повеќе и се задолжувале.

Вкупните кредити достигнаа 5,8 милијарди евра, од кои 3 милијарди евра се кредити на домаќинствата. Тие во однос на 2019 година, пораснеле за 224 милиони евра.

Граѓаните најмногу пари должат за потрошувачки и станбени кредити.