Ова се бонусите на Волстрит

Просечниот бонус на Волстрит скокна за 20 отсто минатата година на највисоко ниво од 2006 година, соопшти Државната ревизорска институција на Њујорк.

Просечната исплата на трговците со хартии од вредност во Њујорк во 2021 година изнесуваше 257.500 американски долари, резултат зајакнат со рекордните нивоа на зделки и тргување со кои управуваат големите банки, бидејќи глобалните берзи скокнаа на највисоко ниво на сите времиња.

„Бројките скокнаа… и се повисоки од очекуваното“, рече државниот ревизор Томас Динаполи, нарекувајќи го „добредојдена вест“, објави Ројтерс.

Волстрит придонесе со околу 18 отсто од сите собрани даноци во Њујорк до 2021 година и треба да и помогне на оваа американска држава да ги надмине своите очекувања во однос на приходите од данокот на доход, се вели во извештајот.

„До 1 април имаме рок за буџетот на државата и ова е добредојдена вест. Тоа дава малку повеќе простор за дишење“, изјави Динаполи.

Се очекува бројни фактори да влијаат на бонусите на берзата оваа година, вклучувајќи ја инфлацијата, тековното закрепнување и економските последици од руската инвазија на Украина. Проценките од градот Њујорк и државата во моментов предвидуваат дека стимулативните пакети за компензација за работниците во индустријата за хартии од вредност ќе паднат во просек за 16 отсто во 2022 година.

Сепак, во 2021 година, вкупниот фонд за бонуси порасна за 21 отсто на 45 милијарди долари за време на традиционалната бонус сезона од декември до март, во споредба со 37,1 милијарди долари во 2020 година, се вели во извештајот.

Индустријата за хартии од вредност сочинува една петтина од платите во приватниот сектор во Њујорк, и покрај тоа што сочинуваат само пет проценти од вработените во приватниот сектор.

Бројот на работни места во фирмите на Волстрит остана релативно ист на околу 180.000, со благ пад од околу 600 работни места, се вели во извештајот.