ОТКАКО Ѝ ПОПУШТИ НА ГЕРМАНИЈА ЗА БИО-ГОРИВАТА: ЕУ ќе забрани нови автомобили на бензин и дизел до 2035

Министрите за енергија на Европската унија (ЕУ) одобрија забрана за производство и продажба на нови автомобили кои користат традиционални мотори на фосилни горива до 2035 година. Италија, Бугарија и Романија вчера се воздржаа од гласањето, додека Полска гласаше против новата мерка, чија цел е да се справи со климатските промени со забрзување на транзицијата кон електрични возила, објави новинската агенција Ксинхуа.

Чешката Република, исто така, го изрази своето противење на мерката, иако министерот за енергетика на земјата на крајот гласаше за неа.

Иако законодавството одобрено во вторникот не ја забранува експлицитно продажбата на автомобили на бензин и дизел, тој бара емисиите на стакленички гасови од новите автомобили да се елиминираат до 2035 година. Тоа значи дека после тоа нема да може да се продаваат нови автомобили кои користат конвенционални мотори со внатрешно согорување датум.

Емисиите од возилата претставуваат околу една четвртина од вкупните емисии на стакленички гасови во ЕУ.

Сепак, Рим, Софија, Варшава и Букурешт се обидуваат да ги ублажат новите правила или да го одложат рокот за спроведување на мерката. Во меѓувреме, во саботата Германија постигна договор со Европската комисија, а потоа гласаше за мерката. Германскиот договор овозможува продолжување на продажбата на неелектрични возила кои работат на синтетички горива што не загадуваат.

Договорот со Германија беше клучен за добивање одобрение за пошироката мерка, која првично беше закажано за гласање во ноември минатата година.

„Постигнавме договор со Германија за идната употреба на е-горивата во автомобилите“, објави на социјалните мрежи Франс Тимерманс, извршен потпретседател на Европската комисија за Европскиот зелен договор. „Сега ќе работиме на тоа што е можно поскоро да се усвојат стандардите за CO2 за автомобили, а Комисијата брзо ќе ги следи потребните правни чекори“.

Италија лобира за уште пошироко ослободување за автомобилите што работат на поширок опсег на биогорива. Во вторникот, италијанскиот министер за животна средина Жилберто Пичето Фратин рече дека земјата „верува дека биогоривата, исто така, може да спаѓаат во категоријата неутрални горива во однос на севкупниот биланс на CO2 и да придонесат за прогресивна декарбонизација на секторот“.

Земјите кои се противат на мерката велат дека се загрижени дека целосната транзиција од автомобилите на бензин и дизел во рок од 12 години ќе ги зголеми пребрзо цените на возилата, што ќе придонесе за инфлаторните притисоци и ќе дејствува како кочница за економскиот раст.

Германскиот производител на спортски автомобили Порше и неговиот италијански ривал Ферари, исто така, се пожалија дека батериите потребни за електричните возила со голема моќност би ги направиле автомобилите премногу тешки за да работат според стандардите на производителот.