Охридски „Костал“ ќе произведува полначи за автомобили на Фолксваген

Фолксваген од 2024 година во охридската фирма „Костал“ ќе се произведува полначи за електрични и хибридни возила. Ова е резултатот од средбата на челните луѓе на таа компанија, на која присуствуваше вицепремиерот за економски прашања, координација на економските ресори и инвестиции Фатмир Битиќи, главниот оперативен директор и член на УО, Хансјорг Херман и генералниот директор на „Костал“ Македонија, Виктор Мизо, во присуство на заменик-амбасадорот на Германија, Ото Граф. Инвестицијата, како што беше речено на средбата, е одговор на кризата која настана во производството на делови за возила на Далечниот исток, но и поради нападот на Украина.

Компанијата очекува и 25 милиони евра државна помош за инвестиции бидејќи ќе се отворат 200 нови работни места во компанијата во која се вработени 950 квалификувани работници чија просечна плата ќе биде 850 евра. Инвестицијата,соопштија надлежните, има и потенцијал да се прошири за уште 40 милиони евра и да вработи уште 350 работници.

Фабриката Костал е дел од Групацијата Костал, еден од водечките светски добавувачи на сложени електронски и мехатронски производи за индустриски и автомобилски апликации. Работи во 21 земја и има повеќе од 20.000 вработени кои ги снабдуваат сите големи производители на автомобили на 5 континенти. Охридската фабрика е технолошки најнапредната фабрика во Македонија, и вработува повеќе од 700 луѓе, а моментално ги снабдува БМВ, Даимлер, Фолксваген, Ауди, Порше и Тесла.