Официјална потврда од „Македонијатурист“: 9,84 отсто од акциите поседува „Скопски пазар“

Информацијата дека „Скопски пазар“ стана еден од мнозинските акционери на „Македонијатурист“ не е нова, но од вчера и официјално е споделена од хотелско-угостителската компанија.

„Согласно член 38 став 1 од Правилата за котација на Македонска Берза АД Скопје, известуваме дека акционерот Скопски пазар акционерско друштво за услуги во прометот и трговијата увоз-извоз Скопје поседува 44.500 односно 9,84% од вкупниот број обични акции издадени од Македонијатурист АД“, пишува во објавата пласирана на Македонска берза.

Всушност, компанијата објави две имнформации. И содржината на втората е позната, дека тетовски „Изо стоне“ повеќе нема ништо со „Македонијатурист“:

„Известуваме дека акционерот Друштво за производство и услуги Изо Стоне дооел Тетово, продаде 29.942 односно 6,62% од вкупниот број обични акции издадени од Македонијатурист АД и сега не поседува акции во Друштвото“.

Веќе пишувавме за крупните промени што настанаа во сопственичката структура на „Македонијатурист“. Доне Таневски и натаму е најголем акционер со 23,4 проценти од акциите. По него следува „Скопски пазар“ на Фатмир Етеми, кој не крие дека има намера и натаму да купува акции.

Меѓу акционерите со над пет проценти се Сава пензиско друштво со 8,8%, Симеон Павлов со 8,19%, „М.Г.Фешн“ со 7,69% од вкупно издадените акции на „Македонијатурст“.

За потсетување, цената на акцијата во овој период одеше и до 9.500 денари, а највисока беше – 11.070 денари, во блок-трансакцијата преку која сиот свој пакет го продаде соработничката на Таневски, Соња Бибановска. На првиот работен ден од неделава, пак, во однос на петокот, вредноста е намалена за 6,23 отсто. Просечната цена запишана во официјалната дневна листа е 7.501,25 денари. Истргувани се 60 акции, а прометот е 450.080 денари.