Од Народна, преку Стопанска банка, во… – каде ќе ја продолжи кариерата Тони Стојановски?

Тони Стојановски не е веќе директор во Стопанска банка. Информацијата од само една реченица, со која од Банката соопштија за оставката на искусниот банкар, предизвика реакции и поттикна шпекулации.

За новонастанатата состојба, односно за промената во органите на управување, од Стопанска банка напишаа:

„Врз основа на член 33 од Правилата за котација на Македонска берза на хартии од вредност АД Скопје, Стопанска банка АД – Скопје известува дека на ден 03 јуни 2024 година г. Тони Стојановски поднесе оставка од позицијата член на Управен одбор и генерален директор за корпоративно банкарство на Стопанска банка АД – Скопје“.

Каде ќе ја продолжи кариерата и дали Стојановски ќе оди на повисока позиција во друга, исто така голема банка, веројатно ќе се дознае наскоро. Интересот на јавноста е голем, затоа што се работи за професионалец кој успешно извршува повеќе функции. Тој е магистер по економски науки од областа на монетарната економија, кој пред ангажманот во Стопанска, бил дел од тимот на Народната банка како генерален директор на Секторот за супервизија, банкарска регулатива и финансиска стабилност. Во рамките на најстарата македонска банка прво ја извршувал функцијата генерален директор за управување со ризици, а потоа, од 2020 година па сѐ до завчера генерален директор за корпоративно банкарство. Од 2010 е и член на Управниот одбор на Стопанска банка.

Инаку, Стојановски е долгогодишен претседател на Одборот на директори на Македонска берза. Последен пат ја доби довербата од Собранието на акцонерите во април годинава. Исто така, потпретседател е на Македонската банкарска асоцијација.