Од игрите на среќа Лотарија на Македонија во позитива од 118 илјади евра

Во текот на минатата година Група Лотарија на Македонија АД Скопје остварила позитивен финансиски резултат од 118,2 илјади евра, односно 7.229 илјади денари. И во споредба со 2021 постигнато е зголемување од 12 проценти.

Кај оперативната добивка е забележан раст од 15 насто и е во износ од 131,4 илјади евра (8.033 илјади денари).

Игрите на среќа на Лотарија и донеле вкупни приходи од 559,4 илјади евра (34.198 илјади денари), односно за 28 насто повеќе од претходната 2021. Во нивната структура со 99,69 проценти доминантни се оперативните приходи, кои за овој период се зголемени за 29 насто. А, пак, финансиските приходи, кои претставуваат само 0,3 проценти од вкупните приходи, бележат намалување.

Лани Лотарија евидентирала пораст од 34 насто во вкупните расходи, кои изнесуваат 426,3 илјади евра или 26.060 илјади денари, а финансиски расходи – нема.

Акционерите се откажале од дивиденда, бидејќи добивката од 2021 била распоредена за покривање на загубите манифестирани во текот на претходните години. Исто така, Лотарија лани во основни средства инвестирала 341,2 илјади евра (20.858 илјади денари). И, како што се наведува, целта е зголемување на приходите со капацитетите на постоечките ресурси со кои располага, а во рамки на актуелното деловно окружување.