Од берзанскиот преглед: Две компании го зголемиле профитот за повеќе од 1.000 проценти
3 мин читање1626 прегледи
Од 94 компании што котираат на Македонската берза 66 го одработиле првиот годинешен квартал со добивка. Кој повеќе, кој помалку, но од нив 35 го зголемиле профитот во однос на истиот период лани. А, две друштва имаат натфрлања од над илјада проценти.
Зголемената добивка за цели 1.367,11 насто што ја бележи „Жито Лукс“, на прв поглед се совпаѓа со општото убедување дека е голем ќарот од „брашно и вода“. Сепак, зад големите проценти стои вредноста од 2.186.000 денари, односно 35,5 илјади евра. Една година претходно профитот изнесувал 149.000 денари, нашто над 2.400 евра.
„Раде Кончар – Апаратна техника“ е втората компанија што се издвојува по големиот раст на добивката – од 1.068,37 проценти. И во овој случај во игра не се големи бројки: 3.435.000 денари (55,8 илјади евра) во изминатот прв квартал наспроти 294.000 денари (4.770 евра) од ланскиот.
Под прагот на илијадарката е „Мода“ АД Свети Николе со 804,02 насто раст на добивката. Или, од минатогодишните 646.000 денари (10,5 илјади евра) на сегашните 5.840.000 денари (94,8 илјади евра).
Во друштвото на компании со највисок раст на профитот е и „Гранит“. Станува збор за исчекор од 794,98 процнети. Инаку, консолидираната добивка на овој градежник е 4.060.072 денари (66 илјади евра).
Оваа листа од пет компании завршува со „Единство“ АД Струмица и зголемувањето од 352,79 процнети, по што на крајот од првото тримесечје консолидираната добивка е во износ од 367.888 денари (речиси шест илјади евра).
Со висок раст на добивката што оди над сто насто има уште неколку друштва меѓу тие што котираат на Берзата, а најмалиот раст од 2,66 проценти е запишан во струмичката „Герас Цунев Конфекција“.
Најголемиот пад на добивката, пак, е евидентиран кај МЗТ „Пумпи“. Од 16.201.000 денари (над 263 илјади евра) во првиот квартал од 2023, на 385.000 денари (6.253 евра) годинава. Намалувањето е за 97,62 отсто.
Минусот регистриран кај битолскиот ЗК „Пелагонија“ е 91,7 проценти. На 31 март добивката изнесувала 8.951.000 денари (145,3 илјади евра). Лани на истиот датум биле 107.847.000 денари (1,75 милиони евра).
На третото и четвртото место се „Тетекс“ и ТТК банка, каде што најголем акционер е тетовската компанија. Намалувањата кај нивните добивки се за 76,23, односно за 73,98 отсто. Или, профитот на „Тетекс“ е 1.327.000 денари (21,55 илјади евра), за разлика од ланските 5.583.000 денари (90,67 илјади евра). А, на ТТК банка 4.241.836 денари (околу 69 илјади евра) наспроти минатогодишниот износ од 16.303.627 денари (264,8 илјади евра).
Падот кај „Фруктал Мак“ е за 72,56 проценти. Добивката се „спуштила“ на 1.078.000 денари (17,5 илјади евра) од лани остварените во истиот период – 3.928.000 денари (63,8 илјади евра).
Со намалена добивка за повеќе од 50 проценти се уште две фирми. Најмалиот минус од 5,11 отсто е на тетовскиот „Интерпромет“.
М.А.