Ново вложување во ТИРЗ – Турски „Шахтерм“ ќе инвестира 70 милиони евра

Турската компанија „Шахтерм“ ќе инвестира 70 милиони евра во изградба на нов производствен капацитет во ТИРЗ Скопје. Компанијата ќе започне со реализација на инвестицијата идната година. Притоа, во план е отворање на повеќе од илјада работни места во текот на наредните десет години. Одлуката за инвестиција е постигната на средбата во Бурса, меѓу директорот на ТИРЗ, Јован Деспотовски, и генералниот менаџер на компанијата, Фарук Шахин.

Новата инвестиција ќе опфати и центар за истражување и развој. Тоа ќе преставува прв производствен капацитет на „Шахтерм“ надвор од Република Турција.

„Шахтерм“ има повеќе од 40 години искуство во дизајн и производство на системи за греење за бела техника и апарати за домаќинство. Се вбројува меѓу петте водечки компании во оваа дејност на глобално ниво, со повеќе од половина од годишното производство наменето за пазарите надвор од Турција.

Листата на клиенти е составена од познати светски производители на бела техника и апарати за домаќинство како „Вирпул“, „Амика“, „Горење“, „Беко“ и „Кенди“.

Со постигнување на овој договор, од почетокот на годината во ТИРЗ е обезбеден вкупен обем на нови инвестиции од над 450 милиони евра, кои се можност за отворање над седум илјади нови работни места.

„Со денешната одлука, „Шахтерм“ станува нов член на семејството на ТИРЗ. Разговорите, посебно оваа последна рунда, не беа воопшто лесни. Но, она што е важно на крајот е одлуката на компанијата да инвестира во Македонија и да имаме нови 1.000 работни места за нашите сограѓани“, изјави Деспотовски при објавувањаето на одлуката во седиштето на компанијата. Тој изрази и благодарност до сите институции, како и до македонската амбасада во Анкара, за поддршката при разговорите со компанијата.