Нора Алити на Годишната конференција на Македонска берза: На пазарот на капитал ќе важат европските правила

Комисијата за хартии од вредност годинава интензивно работеше на финализацијата на текстовите од законите за финансиски инструменти и за проспект и обврски за транспарентност на издавачите. Се очекува  набрзо новата регулатива за пазарот на капитал, која ќе биде со одложена примена, да се најде во собраниска процедура. По  усвојувањето на законите, во текот на 18 месеци ќе се изработува подзаконската регулатива и ќе се врши усогласување во работата, посочи претседателката на КХВ, Нора Алити, во обраќањето на 22. Годишна конференција на Македонска берза што се одржува во Охрид.

„Ни претстои обемна правна реформа која овозможува да имаме исти правила за инвеститорите и за пазарните учесници со правилата на земјите членки, засилена правна заштита и поголема транспарентност“, нагласи Алити.

Значајно е што Комисијата ќе добие нови, сеопфатни овластувања, какви што имаат европските регулаторни тела, со цел поефикасно справување со предизвиците од широкиот опсег на услуги и активности, предвидени со новата регулатива.

„Несомнено, со модернизацијата на регулативата правиме голем исчекор во правец на ЕУ интегрираноста на нашиот пазар на капитал. Тоа е патот на успехот. За да го постигнеме, неопходно е да ја осигураме евро-перспективата на земјата, како најсилна гаранција за економскиот развој“.

Сепак, потенцира, најважна е довербата на инвеститорите и интегритетот на пазарот. „Довербата и интегритетот не можат да се постигнат во изолација, само со законите и со правилата. Само доколку секоја компонента на екосистемот на пазарот на капитал – почнувајќи од инвеститорите, експертите, полиси-мејкерите, регулаторот, овластените  пазарни учесници, давателите односно провајдерите на пазарната инфраструктура,  котираните компании и другите, работиме колективно и заеднички, тогаш ќе  го постигнеме тоа“.

Ова, како што укажа, е особено важно во „вакви интересни времиња“, во кои пандемијата, геополитичките тензии и војната, зголемената инфлација, дестабилизирачките структури…  „можат  да направат на моменти да почувствуваме дека работите одат од лошо на полошо“. Но, додаде, „иако кризите неизбежно ќе не направат risk averse, не можеме да дозволиме факторот на страв да ја поткопа довербата, интегритетот и потенцијалот на нашиот пазар за издржливост и раст“, децидна е претседателката на КХВ, Нора Алити.