Народната банка ги објави монетарните движења за месец август 2019 година

Народната банка во својот месечен извештај за монетарните движења во месец август 2019 година, објави дека вкупните депозити бележат месечен раст од 1,4%, главно под влијание на зголемувањето кај депозитите на корпоративниот сектор (учество од 79,3% во вкупниот раст). На годишна основа, депозитите забележаа еднаков раст како и претходниот месец од 10,0%, којшто се должи на зголемувањето на депозитите кај двата сектора, со поизразен придонес на секторот „домаќинства“.

Додека, кај вкупните кредити, овој месец, е остварен месечен пад од 0,2%, којшто целосно се должи на намаленото кредитирање на корпоративниот сектор. На годишна основа продолжи растот, којшто изнесува 6,4% и главно е резултат на кредитирањето на секторот „домаќинствa“. Доколку се исклучи ефектот на извршените отписи на сомнителни и спорни побарувања под влијание на регулаторните промени, годишниот кредитен раст изнесува 7,8%.

Анализирано според намената на одобрените кредити на физичките лица, во август кај најзастапените категории ‒ потрошувачките и станбените кредити е забележан месечен раст од 0,7% и 0,6%, соодветно, додека годишниот раст е еднаков кај двете категории и изнесува 12,4%. Овој месец, автомобилските кредити бележат месечен пад од 1,1%, додека на годишно ниво се зголемени за 5,8%. Кредитите одобрени на кредитни картички се непроменети во споредба со претходниот месец, додека на годишно ниво се намалени за 2,0%. Кај негативните салда на тековните сметки е евидентирано месечно и годишно зголемување од 1,2% и 2,4%.