На листите со најголем раст и пад – први акциите на РЖ Услуги и на Гранит

На домашниот пазар на капиталот, во октомври најголемиот процентуален раст е забележан кај акцијата на РЖ Услуги. Месечната промена е за 11,11 насто, со кои се претставени дополнителните пет денари што ги добила вредноста на оваа акција – од септемвриските 45 на 50 денари.

Акцијата на Тетекс Тетово има позитивен исчекор од 4,83 насто. На 30 септември чинела просечни  2.194 денари, а на 31 октомври – 2.300 денари.

На средината од берзанската листа на акции со најголем пораст е Македонски Телеком. Со додадените 4,55 насто, единечната цена за акција се зголемила за 20 денари, од 440 на 460 денари.

Следи Витаминка Прилеп, чијашто акција го поправила просекот за 500 денари, односно за 4,17 насто и на крајот од октомври се заокружила на 12.500 денари.

Дополнителните 3,99 насто на акцијата издадена од Реплек ѝ ја обезбедиле петтата позиција од оваа листа. Во апсолутен износ тоа е плус од 614 денари, односно има просечна вредност од 15.995,34 денари.

Во текот на октомври акцијата на Гранит загубила нешто повеќе од 106 денафри од својата вредност. Претходниот месец изнесувала 1.786,51 денар, а потоа 1.680 денари. Минусот од 5,96 отсто ја издвојува како акција со најголем пад.

На крајот од септември акцијата на Стопанска банка Битола имала просечна цена од 3.230 денари, а еден месец подоцна 3.134 денари. Разликата е -2,97 отсто.

Пад од 2,90 отсто е регистриран кај акцијата на Фершпед, чија вредност е намалена за 1.600 денари. Од 55.100 на 53.500 денари.

Акцијата на ТТК Банка загубила 40 денари или 2,42 проценти. Од 1.650 денари, цената опаднала на 1.610 денари.

Минималното осипување од 1,02 отсто, за акцијата со знакот на Мермерниот комбинат од Прилеп значи триесеттина денари помалку: на 30 септември имала просечна вредност од 3.334 денари, а на 31 октомври од 3.300 денари.