ММФ: Глобалната економија е веќе во невоља, догодина ќе биде бетер

Во извештајот објавен во вторникот, Меѓународниот Монетарен Фонд уште еднаш ја намали својата светска економска прогноза бидејќи предвидува големи забавувања во трите најголеми економии: САД, Кина и Европа. Тие падови, во комбинација со тековната војна во Украина, инфлацијата што расте побрзо од очекуваното и построгата монетарна политика ширум светот, продолжија да ја удираат и онака кревката глобална економија, се вели во извештајот.

ММФ сега очекува светската економија да порасне само 3,2% оваа година, што е намалување од 6,1% во 2021 година. Се смета дека следната година ќе биде уште полоша: само 2,9%, само малку над нивото на раст од 2,5% што ММФ вообичаено го смета за глобална рецесија.

Но, таа прогноза претпоставува дека сè останува како што е. Се појавуваат повеќе опасности, вклучително и Русија потенцијално да го затвори протокот на гас во Европа. Доколку тоа се случи, тоа би ја зголемило инфлацијата, а глобалниот раст оваа година ќе се намали на околу 2,6%, на само влакно од жешката зона, според ММФ.

Соединетите Американски Држави ќе западнат во рецесија – а, не мораа, вели поранешниот главен економист на ММФ

Тоа сценарио, предупреди ММФ, би можело да предизвика официјална рецесија следната година, што ќе предизвика глобалниот раст дополнително да падне на само 2%. Тоа ниво на анемичен раст се случило само пет пати од 1970 година, соопшти ММФ.

ММФ веќе ја намали својата глобална прогноза во април, споредувајќи ги последиците од руската инвазија на Украина со „земјотрес“. Во тој момент, таа предвидуваше раст од околу 3,6% и во 2022 и во 2023 година.

Сега, „перспективата стана значително полоша“, напиша Пјер-Оливие Гуриншас, директор за истражување на ММФ, во блог пост во вторникот. „Светот наскоро може да се заглави на работ на глобална рецесија, само две години по последната.

Сите три водечки светски економии се соочуваат со застој во активностите. Во Соединетите Американски Држави, потрошувачите се со помала куповна моќ како што растат цените – што доведува до пониски од очекуваните потрошувачки трошоци, забележа ММФ. Во Кина, заклучувањата на Ковид-19 продолжија да ја попречуваат економијата, предизвикувајќи забавување што „беше полошо од очекуваното“, додаде групата. ММФ ги намали очекувањата за растот на кинескиот БДП оваа година, од 4,4% на 3,3%. Тоа е далеку под официјалната цел на владата од околу 5,5 отсто и би претставувала „најбавна стапка во повеќе од четири децении, со исклучок на пандемијата“, според Гуринчас.

Во Европа, цената на руската инвазија на Украина е повисока од очекуваната, со скок на цените на енергијата, „послаба доверба на потрошувачите и побавен моментум во производството како резултат на постојаните прекини на синџирот на снабдување“, соопшти ММФ.
Бизнисите веќе почнуваат да се подготвуваат за најлошото. Во вторникот, компанијата Џенерал Моторс соопшти дека се подготвува за економски пад, намалувајќи ги трошоците и бројот на вработени.