Македонија ќе ја мери енергетската сиромаштија по европски терк

Македонија првпат добива јасни критериуми за ранливите домаќинства кои се соочуваат со енергетска сиромаштија. Загрозените семејства ќе се препознаваат според ниските приходи, високите трошоци за енергија во семејниот буџет и по ниската енергетска ефикасност на домаќинствата. Овие параметри ќе бидат основа за креирањето на годишните програми за заштита на ранливите енергетски потрошувачи.

Драфт-верзијата на Методологијата за мерење на нивото на енергетска сиромаштија доби позитивен одговор од Секретаријатот на Енергетската Заедница, соопштија од Министерството за енергетика, рударство и минерални суровини. Документот е во согласност со европските стандарди и со обврските кои произлегуваат од Директивата (ЕУ) 2019/944, која ги задолжува земјите да воспостават и објават критериуми за утврдување на енергетската сиромаштија.

Тоа значи дека методологијата е целосно прифатлива за објава, а воедно претставува и прв ваков систематизиран документ во земјава кој ќе овозможи реално мерење и следење на овој феномен.

Од Министерството наведуваат зошто е важна оваа методологија:

• Ќе овозможи институциите да имаат јасна слика за обемот и структурата на енергетската сиромаштија во земјата.
• Ќе послужи како основа за креирање таргетирани политики и мерки за заштита на домаќинствата кои најмногу се соочуваат со тешкотии при обезбедување енергија.
• Ќе придонесе кон усогласување со европските практики и стандарди, како дел од пошироката агенда за енергетска транзиција и социјална одржливост.

Министерството за енергетика веќе работи на следните чекори – подготвување на годишна програма за заштита на ранливите потрошувачи, каде методологијата ќе биде централна алатка за дефинирање на приоритетите и интервенциите.

„Со оваа методологија за првпат систематски ќе ја измериме енергетската сиромаштија во земјава. Тоа ќе ни овозможи јасно да ги идентификуваме домаќинствата кои се најпогодени и да креираме прецизни, таргетирани мерки за нивна заштита. Нашата цел е никој да не биде оставен на маргините. Ова е силен чекор напред кон една поправедна и посоцијално одржлива енергетска политика“, истакна Министерката за енергетика, рударство и минерални суровини, Сања Божиновска.

Со ова, Македонија прави значаен исчекор во градењето на праведна енергетска политика која се грижи за граѓаните и ја става социјалната димензија на енергетската транзиција во фокусот.