Кој зема највисоки плати во Македонија a кои плати се на дното?

Каде се крие највисоката просечна бруто-плата во Македонија, а каде платите се на дното, далеку под просекот?

Согласно податоците на Државниот завод за статистика, просечната месечна нето-плата во март годинава изнесува 28.217 денари и бележи раст споредбено со истиот месец лани за 6,8 отсто.

Според Статистика, највисоката бруто плата во март изнесувала 107.022 денари. Толкава плата е исплатена во дејноста компјутерско програмирање, консултантски и сродни дејности.

Со плата од 73.657 денари на второто место се позиционирани платите во дејноста телекомуникации, а веднаш по нив следува дејноста производство на основни фармацевски производи и фармацевски препарати со 70.008 денари. На четврто место се плати во дејноста финансиски услуги, освен осигурување и пензиски фондови со 66.933 и воздухопловен транспорт со 64.338 денари.

Најниска просечна плата е регистрирана во дејноста производство на кожа и слични производи од кожа и изнесува 23.579 денари  бруто што е далеку под просечната нето плата во Македонија.

Во рангот на најниски пет плати следат платите во дејноста заштитни и истражни дејности со плата од  24.700 денари, па дејноста туристички дејности и туроператори и останати резервациски услуги и дејности поврзани со нив со плата од 25.542 денари.

Потоа, следува дејноста производство на облека со просечна плата од 26.173 денари и услуги поврзани со одржување на згради и уредување и одржување на животна средина и природа со плата во просек од 26.218 денари.