КИНЕСКИ МЕДИУМИ ЈАВУВААТ дека најмалку 36 лица загинале во пожарот во Хонг Конг, а 279 се водат како исчезнати

Пожарот кој ја опустоши населбата Ванг Фук Корт, станбен комплекс во кој живеат околу 4.600 луѓе во областа Таи По во градот Хонг Конг, и по повеќе часовни обиди за негово локализирање, до полноќ по локално време се’ уште беснее, јавуваат светските медиуми. Извршниот директор на Хонг Конг, Џон Ли, на прес-конференција изјави дека 36 лица загинале во пожарот во Таи По, а најмалку 279 лица се водат како исчезнати.

Уште 29 лица се хоспитализирани, од кои седум се во критична состојба, откри извршниот директор Џон Ли на прес-конференција рано наутро во болницата „Принц од Велс“.

Повеќе од 700 пожарникари и десетици противпожарни возила се распоредени во Ванг Фук Суд за справување со она што останува пожар од ниво 5 – најсериозната категорија.

Претседателот Си Џинпинг изрази сочувство за смртните случаи предизвикани од пожарот, според кинескиот државен радиодифузер CCTV.
Политичките партии ја прекинаа кампањата за да покажат поддршка за погодените жители, а неколку локални училишта потврдија дека ќе останат затворени во четврток.

Сè уште не е јасно колку луѓе се заробени во зградата или што го предизвикало пожарот.

Огромни облаци од темен чад се издигаа високо кон небото на местото на настанот во Ванг Фук Корт, станбен комплекс составен од осум блока во градскиот кварт Таи По на североисток на Хонг Конг, додека екипи на пожарникари се обидуваат да го изгаснат пожарот, објавија светските агенции.

Полицијата соопшти дека добила повеќекратни пријави за луѓе заробени во зградата каде што започнал пожарот, при што еден маж и една жена наводно се во несвест и страдале од изгореници.

Се работи за комплекс од јавни станбени објекти – осум згради и речиси 2.000 станови. Според податоците од последниот попис, во него живеат повеќе од 4.600 жители, меѓу кои и многу постари жители.

Пожарот првично бил класифициран како пожар со аларм број 1, но брзо бил зголемен на број 4 до 15:34 часот, а потоа на највисоко ниво број 5 во 18:22 часот. Во Хонг Конг, пожарите се оценуваат на скала од еден до пет, при што повисоките бројки укажуваат на поголема сериозност.

Снимките од местото на настанот покажуваат бамбусово скеле пред неколку станови од зградата зафатенo од пламен, а запалени делови од скелето паѓаат на земја.

„На жителите во близина им се советува да останат во затворен простор, да ги затворат вратите и прозорците и да останат смирени“, соопшти Противпожарната служба.

Делови од блискиот автопат се затворени поради тековната операција за гаснење пожари.

Таи По е приградска област сместена во северниот дел на Хонг Конг, во близина на границата со градот Шенжен на копното на Кина.