Каматите во октомври: Просечната стапка за кредитите во четиримесечно мирување

Кредитокорисниците, од јули па заклучно со октомври, имале можност малку да здивнат во поглед на движењата кај каматите. Просечната стапка на вкупните кредити опстојува на 5,49 проценти. Стагнацијата не се однесува и на годишното ниво, каде што има промена за плус 1,09 процентни поени. Континуирана е линијата на раст кај просечната каматна стапка на вкупните депозити. На месечно ниво има од 0,08, а на годишно од 0,93 п.п. и изнесува 1,67 проценти. Податоците се од последниот извештај на Народната банка за позначајните движења кај каматните стапки на банките и штедилниците во октомври.

Во текот на тој месец просечната стапка на новоодобрените кредити е со раст од 0,06 п.п., а на годишна основа за 1,11 п.п. Дојдена е на ниво од 5,55 проценти. Кај новите депозити каматата е со просек од 2,32 проценти. Зголемувањето е 0,17 п.п. на месечна основа, при годишен раст од 0,82 п.п.

Според податоците од Народната банка, просечната каматна стапка на вкупните кредити на корпоративниот сектор во октомври е иста како и септемвриската – 5,37 проценти. Годишно има раст за 1,66 п.п.

Каматната стапка на новоодобрените кредити изнесува 5,71 процент и е зголемена за 0,21 п.п. на месечно ниво, што се должи на повисоките стапки на денарските кредити без валутна клаузула. Споредено со ланскиот октомври, каматата е повисока за 1,35 п.п.

Во сегментот депозити просечната каматна стапка бележи месечно зголемување од 0,02 п.п. и изнесува 1,96%. Тоа произлегува од повисоките каматни стапки на денарските депозити без валутна клаузула. На годишна основа растот е за 0,70 п.п.

За новопримените депозити од овој сектор стапката е 1,51 процент, при што е евидентирано месечно намалување од 0,14 п.п. Врз промената влијаел падот на каматните стапки на девизните депозити. Минусот е присутен и на годишно ниво, од 0,15 п.п.

Со минимален месечен пад од 0,01 процентен поен, каматната стапка на вкупните кредити на домаќинствата изнесува 5,60 проценти. Од Народната банка посочуваат дека тоа е резултат на намалувањето на стапките за девизните, но и за кредитите со валутна клаузула. Годишниот раст е за 0,57 п.п.

Намалена за месечни 0,19 п.п. е стапката на новоодобрените кредити и изнесува 5,28 проценти. Промената се должи на падот кај каматите на денарските кредити без валутна клаузула, во странска валута и кај задолжувањата со валутна клаузула. На годишно ниво, просекот на стапката е повисок за 0,70 п.п.

Зголемување во октомври, од 0,09 п.п. има кај стапката на вкупните депозити, која изнесува 1,64 проценти. Ова движење е засновано врз растот на каматните стапки што важат за денарските депозити без валутна клаузула и за девизните влогови. Стапката е зголемена за 0,94 п.п. на годишна основа.

Новите депозити на населението во десеттиот месец имале просечна стапка од 2,57 проценти, по растот од 0,17 п.п., кој произлегува од нагорното движење и кај каматите на девизните и на денарските депозити. Споредено на годишно ниво, каматната стапка бележи зголемување од 1,12 процентни поени.