Јаневска најави 60 спортски сали и вкупно 160 инвестиции во образованието

Сто и шеесет инвестиции, од кои 60 спортски сали ќе се реализираат во рамките на образовниот систем, најави министерката за образование и наука, Весна Јаневска. Минатата година во инфраструктурата биле вложени 67 милиони евра.

„Почнуваме нов циклус на вложување во образовни инфраструктурни објекти, кои се еден од основните елементи за подигнување на квалитетот на образованието и за развој на психичкото и   физичкото здравје на учениците. Лани вложивме 67 милиони за инфраструктурата“, истакна Јаневска по поставувањето на камен-темелникот на новата спортска сала во ОУ „Григор Прличев“ во скопска Железара.

Во фаза на реновирање се 30 спортски сали, а за уште толку почнува изградбата.

„Она што Владата, Министерството и општините го ветуваат, заеднички работејќи го исполнуваат. Почнуваме со изградба на нови 30 спортски сали и уште 30 се во процес на реновирање“, рече министерката.

Вкупната инвестиција во спортската сала во ОУ „Григор Прличев“ изнесува 39 милиони денари, а денес почнува со реализација првата фаза во вкупен износ од 20 милиони денари. Салата ќе ги има сите пропратни содржини со што учениците и младите ќе добијат современи услови за спорт и рекреација.

На настанот присуствуваа и премиерот Христијан Мицкоски и градоначалникот на Општина Гази Баба, Бобан Стефковски.