Што е поголемо зло – стагфлацијата или инфлацијата во економијата?

Инфлацијата како состојба се вбројува во една од најсложените и најкомплексните појави во економијата. Сепак, таа постои во сите економии и врз основа на предвидувањата и очекувањата за нејзиното движење инфлацијата е и вкалкулирана во идното работење на сите економски субјекти.

Но, зошто тогаш луѓето се плашат од инфлацијата? Што претставува таа, воопшто, и кои се причините за нејзиното појавување? Зошто инфлацијата е комплексна појава во економијата?

Инфлацијата која е во умерени размери, кога таа е едноцифрена и се карактеризира со благ пораст на цената на производите и услугите, вообичаено не предизвикува некои посериозни негативни ефекти врз економијата, бидејќи најчесто е очекувана и предвидена. Цените се релативно стабилни, исто како и националната парична единица во земјата. Меѓутоа, она што загрижува и ги плаши луѓето се галопирачката инфлација и хиперинфлацијата, кога парите вртоглаво ја губат својата вредност. Ваквите видови инфлација создаваат сериозни потешкотии за функционирањето на компаниите и предизвикуваат непроценливи штети за економијата воопшто.

Инфлацијата е состојба кога во економијата паричните фондови се поголеми од стоковите фондови што резултира со пораст на општото ниво на цените и намалување на вредноста на парите.

Најчесто инфлацијата се мери земајќи го предвид индексот на трошоците на живот – цени на добра и услуги кои влегуваат во потрошувачката кошничка на едно семејство.

Бидејќи инфлацијата е сложена појава, причините за нејзиното појавување се многубројни и може да се бараат како на страната на побарувачката, така и на страната на понудата. Но, исто така, инфлацијата може да се создаде и со мерките на монетарната и фискалната политика на државата.

Инфлацијата е тесно поврзана со невработеноста и растот на бруто домашниот производ (економскиот раст) и сите три појави заедно претставуваат главни проблеми на макроекономските анализи. Дејствувањето на овие три главни проблеми заедно ја претставуваат состојбата во економијата наречена стагфлација.

Стагфлацијата во економијата е состојба кога растечките стапки на инфлацијата се придружени со стагнација или намалување на економскиот раст и високи стапки на невработеност.

Стагфлацијата е релативно нов феномен и исто како и инфлацијата е резултат на дејствување на повеќе фактори во економијата. Иако условени од многубројни фактори, сепак појавите на висока инфлација и стагфлација се негативни состојби во економијата врз кои значајно може да влијае државата преку успешно управување со нејзините расположливи инструменти со цел регулирање на економската состојба.