Индијците, Турците и Србите лани добиле најмногу германски работни визи, а еве каде се Македонците на оваа листа

На државјаните на Индија, Турција и Србија им е издаден најголем број национални работни визи од германските власти во 2022 година, покажуваат неодамнешните податоци на Сојузното министерство за надворешни работи на Германија. Според овој извештај, земјата одобрила вкупно 152.336 национални работни визи на странци во 2022 година, што претставува значително зголемување во споредба со 2021 година, пишува SchengenVisaInfo.com.

Од сите националности, податоците покажуваат дека на Индијците им бил издаден најголем број работни визи од Германија во 2022 година или вкупно 17.379 работни визи, при што повеќето од нив, 8.613 работни визи, биле доделени од Генералниот конзулат на Германија во Бангалор. Турските државјани се втори по големина корисници на работни визи издадени од Германија. Минатата година на вкупно 12.542 државјани на Турција им била издадена работна виза.

Поголемиот дел од работните визи за Турците беа издадени од германската амбасада во Истанбул и од Генералниот конзулат во Анкара, при што тие издадоа 6.410 и 4.735 национални работни визи, соодветно. Покрај тоа, генералниот конзулат во Измир минатата година издаде 1.397 национални работни визи на Турците.

Србите се на трето место по стекнување документи за работен престој во Германија, при што им беа доделени вкупно 11.792 национални работни визи, сите издадени од германската амбасада во Белград.

Освен овие три најбројно застапени националности, Германија им додели голем број национални работни визи на граѓаните на Босна и Херцеговина, кои добија вкупно 10.524 работни визи од Германија во 2022 година. Потоа следуваат државјаните на Косово, на кои им биле доделени 9.309 работни визи, државјаните на Русија, на кои им биле доделени 6.975 работни визи, државјаните на Албанија, кои биле доделени се 6.526 работни визи, а државјаните на Северна Македонија се најдоа на осмото место според бројот на доделени визи за престој во Германија со работа, односно 5.796 работни визи.

Минатата година Германија издаде вкупно 393.083 национални визи, а по работните визи се издадени вториот и третиот најголем број визи за обединување на брачните другари и цели за студирање. Издадени се 71.129 национални визи за обединување на брачните другари и 71.018 национални визи за студирање во 2022 година.