И ПОКРАЈ НАЈАВИТЕ ДЕКА ЌЕ СЕ СТАВИ ПОД КОНТРОЛА ЦЕНАТА НА СТРУЈАТА, сепак ќе има зголемување за околу 3%

И покрај тоа што претходно се најавуваше дека струјата нема да поскапи од 1 јануари, со оглед дека веќе две недели струја се увезува, а на берзата ХУПЕКС цената стигна до 300 евра за мегаватчас, а и дека компанијата ЕСМ е во исклучително лоша состојба и нема помош од Буџетот има земено и кредит од домашните банки, сепак струјата ќе поскапи за 2 до 3 отсто.

-Не очекувам да има зголемување на цената на струјата од 10-15 отсто, како што е случај во повеќе земји од регионот и во Европа. Очекувам, ако има, да биде незначително, најмногу до 3 отсто. Не очекувам да биде повеќе од тоа – изјави премиерот Христијан Мицкоски.

Според него, цената по која ЕСМ ќе ја испорачува струјата кон ЕВН хоум, ќе биде меѓу 58 и 62 евра за мегават час, која е во рамките на 60 евра по која ја испрачува до сега.

На прашањето дали цената на струјата на ЕСМ и натаму ќе се одржува вештачки под производната цена за мегаватчас, со оглед на тоа што е повисока, а сега е 60 евра, Мицкоски рече дека ЕСМ има приходи од електричната енергија која што ја дава на ЕВН хоум, како и од системски услуги односно терциената енергија која што ја дава на МЕПСО и плус од загубите кои што ги продава и на МЕПСО и на дистрибутерот.

Регулаторната комисија за енергетика (РКЕ) го разгледува барањето за зголемување на цените од енергетските компании, но конечната одлука за новата цена на струјата сè уште не е донесена. Претседателот на РКЕ, Марко Бислимовски, посочи дека доставените пресметки од компаниите се високи и за Комисијата неприфатливи.

Според информациите, операторот МЕМО побарал зголемување од речиси 80%, а МЕПСО за 50%. Бислимовски вели дека овие бројки се само дел од факторите кои ќе ја одредат финалната цена. Одлуката ќе зависи и од понудената цена од ЕСМ на тендерот за ЕВН Хоум и од трошоците за покривање на загубите на електрична енергија.

-Голем број на мали потрошувачи се враќаат на слободниот пазар, што создава притисок врз цената. Сепак, сè уште немаме податоци за цените по кои ќе се купуваат загубите – рече Бислимовски.