Хрватите со бојкот против скапотијата – Трговците нудат попусти, продавниците празни

„Нема ни цент да потрошам“, „Доста ни е да плаќаме за производите што некогаш беа достапни, а сега се луксуз“… реагираат на социјалните мрежи граѓаните на Хрватска, каде што денес, поради енормните зголемувања на цените, започна бојкотот на продавниците, трговските синџири и бензинските пумпи. Се објавуваат слики и видеа на кои се гледаат празни маркети, со кои се потврдува дека Хрватите позитивно одговараат на иницијативата на овој начин да им се спротивстават на поскапувањата.

Наспроти нив, според хрватските медиуми, трговците денес настапуваат со акциска продажба и големи намаленија. „Да се стават на листата за повеќедневен бојкот сите продавници кои денес производите ги даваат на акција“, реагираат потрошувачите.

Иницијативата за бојкотот е на платформата „Ало, инспекторе“, а доби поддршка од здруженија за заштита на потрошувачите, синдикати, политички партии, дури и министерот за економија.

Во Хрватска, потрошувачките цени мерени со ХИЦП (европски усогласени индекси на потрошувачки цени) лани во декември забележале раст од 4,5 насто во споредба со истиот месец во 2023 година. Што, пак, е нивен најсилен раст од мај.

За првпат во историјата на Република Хрватска потрошувачите се организираат и сакаат да покажат што мислат за поскапувањата и инфлацијата, вели Јосип Келемен од „Ало, инспекторе“.

Потребата од бојкот се аргументира со тоа што ниту една членка на ЕУ не забележала вакво поскапување, особено на храната, во последните две години. А, тој раст не запира и во најава се  нови поскапувања, а за десетици илјади граѓани состојбата со поскапувањата е неподнослива.

Првата цел е постигната, сметаа од „Ало, инспекторе“ : „Гласот на потрошувачот се слуша посилно, погласно и посериозно од кога било. Проблемот со неверојатните поскапувања во Хрватска конечно стана тема за оние на кои досега не им беше тема. Предизвикавме реакција од сите што доведоа до ова, увозниците, дистрибутерите, трговците и владата која има мандат и алатки да ги реши ваквите нарушувања“. За постигнување на третата цел – запирање на понатамошниот раст на цените, велат, потребно е малку повеќе време. „Свесни сме дека пазарот е сложен механизам и цените нема да паднат преку ноќ поради еден бојкот, но овој огромен раст може и мора да се запре“, тврдат од „Ало, инспекторе“.