ГРОБНО МЕСТО ПОКРАЈ ЏИМ МОРИСОН ВО ПАРИЗ? Може, само пријавете се за учество на лотарија!

Сакате вашето место за вечен престој да биде покрај некоја славна личност? Париската локална самоуправа реши да им го овозможи тоа на ограничен број на луѓе, подготвени добро да платат.

Гробиштата Пер Лашез во Париз се последното почивалиште на некои од најголемите имиња во историјата и поп-културата, вклучувајќи ги Џим Морисон од „Дорс“, писателот Оскар Вајлд, Марсел Марсо и Фредерик Шопен. Сега претпријатието што ги надгледува тие гробишта им нуди на луѓето можност да имаат свое гробно место таму – или други историски француски гробишта, вклучувајќи ги Монпарнас (кој меѓу своите вечни жители ги брои Жан-Пол Сартр и Жак Ширак) и Монмартр (кој ги сместува останките на импресионистичкиот сликар Едгар Дега и Шарл-Анри Сансон, кралскиот џелат кој го погубил Луј XVI).

Триесет надгробни споменици од гробиштата се во лоша состојба и можат да се купат за 4.000 евра. Сепак, кој и да ги купи, мора да ги реставрира спомениците, а потоа да го купи гробното место до надгробната плоча што ја реставрираат.

Поради огромната побарувачка, службениците планираат продажбата да ја спроведат како лотарија. Извлекувањето ќе се одржи во јануари.

Нудењето вечно почивалиште покрај ѕвездите е компромис, велат градските службеници на Париз, кој истовремено ги почитува мртвите и им овозможува на жителите да бидат погребани во градот, каде што има многу малку простор за гробови.

Семејствата се одговорни за одржување на надгробните споменици и спомениците во Париз, но некои гробови со текот на времето се напуштени, што предизвикало некои надгробни плочи да се распаднат.

Да биде јасно, ниту еден од надгробните споменици што се продаваат не му припаѓа на некој од најпознатите жители на гробиштата, па можеби нема да бидете во иста линија со Џим Морисон, но би можеле да бидете во близина.

И, во моментов, апликациите за овие купувања се отворени само за жители на Париз – и тие ќе имаат само шест месеци да ја обноват надгробната плоча и ограничен временски период потоа да ја купат парцелата.

Погребните парцели се продаваат или за вечен рок (17.668 евра) или можат да се изнајмат за 10, 30 или 50 години, по цени кои се движат од 1.120 до повеќе од 6.000 долари.

(Фото: Getty Images via Quartz)