Грција со нов пакет помош од 3,2 милијарди евра ќе ги штити потрошувачите од енергетската криза

Грција планира нов пакет мерки од 3,2 милијарди евра за да го намали притисокот врз буџетите на домаќинствата и бизнисите од зголемените цени на енергијата, изјави во петокот министерот за финансии, Христос Стаикурас. Како и многу други земји, Грција е во канџите на зголемените цени на гасот, струјата, горивото и храната од минатата година, влошени по руската инвазија на Украина на 24 февруари.

Од септември, Атина ги субвенционира сметките за струја и гас, а исто така понуди еднократен грант за ранливите групи во вкупна вредност од 4 милијарди евра. Вчера, премиерот Киријакос Мицотакис во телевизиско обраќање рече дека владата, исто така, ќе постави плафон на големопродажните цени на електричната енергија и ќе врати до 60 отсто од сите доплати што потрошувачите на електрична енергија со годишни приходи до 45.000 евра ги платиле во декември- мај, меѓу другите мерки.

Стаикурас рече дека програмата за поддршка на конзервативната влада делумно ќе биде финансирана од државниот буџет. „Вкупната цена на мерките е 3,2 милијарди евра, од кои 1,1 милијарди евра доаѓаат од буџетот“, рече Стаикурас на брифингот со новинарите.