Граѓанскиот револт ги активира властите: И цените и акциските продажби одат под мраз

Реакциите на граѓаните ги забрзаа владините одлуки: одделни цени од идната недела повторно одат под мраз, а трговците не ќе смеат да организираат акциска продажба се до крајот на ноември. Поради тоа, до Владата веќе се испратени предлог одлуки за забрана на акциска и промотивна продажба во сите синџири на маркети до 30 ноември, кои се во насока на спречување измами и потрошувачите да не се доведуваат во заблуда.

„Ова може изгледа како чудна одлука, се чини дека ќе им скратиме на граѓаните одредени права, но не е така. Веќе од идната недела следи замрзнување на прехранбените производи“, тврди министерот за економија, Крешник Бектеши.

Притоа, ќе бидат соопштени цените на сите производи кои ќе бидат фиксирани на одредено ниво, па купувачите ќе имаат целосен увид во тоа – по која цена се продаваат производите. Сите маркети кои нема да ја почитуваат мерката ќе добијат високи казни, можно е и да бидат затворени или да се одземе дозволата за работа. Според тврдењето на министерот, нема основа за зголемување на цените на прехранбените производи, во услови на намалување на инфлацијата. Поради тоа, цените ќе треба да се намалат најмалку за 10 проценти.

„Сите анализи покажуваат дека нема основа за зголемување на цените на прехранбените производи и од страна на трговците и од страна на производителите, имајќи го предвид намалувањето на цените на основните прехранбени производи на светските берзи и споредувајќи ги со цените како на увезените производи, така и на суровините за домашното производство. Точно е дека има намалување на инфлацијата во однос на претходниот период, но според анализите на Министерството за економија има простор за уште поголемо намалување“, наведе Бектеши. Исто така посочи, завршните сметки на големите маркети покажуваат дека не само што не ги намалиле приходите, туку ги зголемиле во текот на минатата година.

Ценовната листа најверојатно ќе се обелодени во вторник, по владината седница, на која ќе се разгледува предлог-одлуката од Министерството за економија.

Инаку, на претстојната средба со претставниците на големите маркети, Бектеши ќе ги информира за одлуката на ресорното Министерство – за линеарно намалување на цените на храната од најмалку 10 проценти.

Воедно, Државниот пазарен инспекторат ќе ги засили теренските контроли.