Граѓаните им должат на банките четири милијарди евра

Банките во државата располагаат со вкупни депозити од 570.298 милиони денари или 9,27 милијарди евра. На годишно ниво се зголемени за 11 насто, а месечната промена октомври-ноември е 0,9 насто. Движењата се главно стимулирани од штедачките навики на граѓаните. Истовремено, кредитирањето бележи раст по нагорна линија од 9,7 проценти, а минатот месец поместувањето е за 0,7 проценти, со поголем придонес на корпоративниот сектор. Или, со ноември, вкупната кредитна поддршка е во износ од 481.410 милиони денари, односно 7,82 милијарди евра.

Кај секторот домаќинства, според ноемврискит извештај на Народната банка, забележан е месечен раст на депозитите од 1,9%, додека годишниот е 13,3%/. А, произлегува од зголемените депозитни пари и долгорочните депозити. Притоа, на нивните сметки има вкупно 381.857 милиони денари, што е еднакво на 6,2 милијарди евра.

За еден месец кредитите одобрени на населението се зголемени за 0,7% како резултат на речиси подеднаков раст на кредитите во странска валута и во денари. На годишно ниво се работи за дополнителни 8,2%, каде што доминираат задолжувањата во денари. Сумата со која се задолжени граѓаните е 246.867 милиони денари (над четири милијарди евра).

Најактуелните – потрошувачките кредити, достигнуваат износ од 127.183 милиони денари или нешто повеќе од две милијарди евра. Месечниот раст е 0,7%, а годишниот 7,3%.

За решавање на станбеното прашање се употребени 92.301 милион денари (1,5 милијарди евра). Кај нив двиѓењата се 1,2% месечно и 11,6% годишно.

Во ноември се намалени за 0,7% автомобилските кредити, но на годишна основа растат за 10,8%. Кредитите одобрени на кредитни картички забележаа месечен и годишен пад од 1,0% и 9,2%. А, пак, на двете нивоа се намалуваат минусите направени преку тековните сметки (4,7% и 4,8%) и кредитите одобрени врз други основи (0,3% и 14,3%).

Во вкупните депозити, корпоративниот сектор учествува со 162.168 милиои денари (2,63 милијарди евра). Во ноември овде има пад од 0,6%, поради намалувањето на депозитните пари и краткорочните девизни депозити. Годишниот раст изнесува 7,0%.

Кредитите на компаниите во ноември минатиот месец се зголемени за 0,8%, што се должи на повисокото кредитирање, пред се во денари. На годишна основа растот е 11,5%. Кредитната поддршка дадена од банките е во вкупен износ од 232.121 милион денари или 3,77 милијарди евра.