Ѓорѓи Петрушев на „Бизнис Лидер“: Лидерството не се мери по големината, туку по одговорноста

Зборот „одржливост” се употребува пречесто, но се практикува премалку, иако одамна престана да биде избор. Глобалните трендови се јасни – климатските промени, демографските движења, социјалната нееднаквост и новите генерации на потрошувачи бараат одговорни компании. Тоа не е повеќе „убаво да се има“ во годишните извештаи, туку е предуслов за опстанок, нагласи генералниот директор на Млекара Битола, Ѓорѓи Петрушев – панелист на конференцијата „Бизнис Лидер“.

Според него, одржливоста е систем, поврзаност, начин на размислување. Тоа е економска и општествена стратегија за долгорочна конкурентност. Притоа, посочи дека во БиМилк одржливоста има конкретни координати: локални синџири, партнерство со фармерите, технологии за минимален отпад, енергетска трансформација и човечки капитал.

„Во Бимилк, секој ден ја живееме оваа одржливост. Секојдневно снабдуваме повеќе од еден милион потрошувачи. Тоа е еден милион причини да бидеме одговорни. Тоа е еден милион семејства кои очекуваат од нас квалитет, сигурност и доверба. Секој од тие потрошувачи не купува само производ, туку и доверба. А довербата, еднаш изгубена, никогаш не се враќа. Квалитетот е темелот на нашето лидерство. Најголемата конкурентност не произлегува од цената, туку од квалитетот“, нагласи Петрушев.

Тој укажа и на врската меѓу одржливоста и лидерството.

„Ако одржливоста не се прифати од лидерите како основна вредност, ако не се вгради во ДНК на компанијата од страна на лидерите, одржливоста ќе остане само buzzword и можеби PR алатка. Лидерството е клучно за трансформација од одржливоста како стратешка намера до оперативна реалност. Во ера на климатски предизвици, геополитика и инфлација, лидерството е способност да се обединат луѓе, процеси и технологија околу јасна цел.

Ако одржливоста не ја градиме свесно денес, утре ќе ја плаќаме скапо – како компанија, но и како општество“, истакна Петрушев.

Воедно, издвои – приватниот сектор мора да оди чекор напред – од извештаи кон мерливи резултати на терен, од PowerPoint кон нови процеси и технологии.

„Да бидеме лидери што оставаат вредности, а не само бројки, зашто лидерството денес не се мери по тоа колку сме големи, туку по тоа колку сме одговорни“, порача првиот човек на БиМилк, Ѓорѓи Петрушев.