Германските банки бараат санкциите за Русија да бидат прецизни и недвосмислени

Германските банки во вторникот ги повикаа креаторите на политиката да се погрижат новите санкции против Русија да бидат „прецизни и недвосмислени“, отстранувајќи го секој простор за толкување што може да им отежне на финансиските фирми да ги спроведат.

Изјавата од германското банкарско лоби BdB доаѓа додека амбасадорите на ЕУ во Брисел се очекува да утврдат поширок пакет санкции за Русија откако рускиот претседател Владимир Путин нареди војници во отцепените региони на источна Украина. Министрите за надворешни работи на Европската унија може да донесат одлука за санкциите за Русија по состанокот во Париз уште попладнево.

Од европските банки – најизложени кон Русија се оние во Австрија, Италија и Франција. Заемодавачите низ Европа се подготвуваат за построги санкции насочени кон Русија, а неусогласеноста би ризикувала строги казни.

„За банките, клучно е санкциите да бидат формулирани на доволно прецизен и недвосмислен начин, односно да не оставаат отворени прашања за толкување“, се вели во соопштението на германската банкарска асоцијација.

Од австриската Рајфајзен Банк Интернационал, која има големи операции во Русија и Украина, велат дека бизнисот сега е нормален, но „во случај на ескалација, кризните планови што банката ги подготвуваше во изминатите неколку недели ќе стапат на сила“. Од ИНГ од Холандија, која има големо присуство на Русија, рекоа: „Понатамошна ескалација на конфликтот може да има големи негативни последици“.

Засега банките се во неизвесност додека санкциите не станат конкретни. „Ја следиме ситуацијата“, изјави портпаролот на Европската банкарска федерација во Брисел.