Инвеститорите тријат раце бидејки Џенерал Моторс купи 11% од „Никола Корп“

Џенерал Моторс објави дека купил 11 процентен удел во американската корпорација „Никола Корп“, која произведува електрични камиони.

Во изјавата на Џенерал Моторс се прецизира дека вредноста на трансакцијата е околу две милијарди долари и дека ќе ги здружи силите со „Никола Корп“ во областа на производство на пикап-камиони, пренесува Ројтерс.

Акциите на „Никола“ по објавувањето на оваа вест скокнаа за повеќе од 30 проценти, на 46,30 УСД, во тргувањето пред официјалниот почеток на берзата.

Двете компании ќе работат заедно на камионот „Никола Баџер“, чие производство се очекува да започне до крајот на 2022 година. Овој камион ќе се натпреварува на пазарот со „Тесла“, како и со електрични камиони планирани од стартапот Ривијан.

Како дел од трансакцијата, Џенерал Моторс ќе добие акции на „Никола“ од новата емисија вредна две милијарди долари и право на едно место во бордот на директори на овој производител на електрични камиони.

Двете компании очекуваат да заштедат 4 милијарди долари за батерии и трошоци за возење и повеќе од една милијарда долари за инженеринг, тестирање и лиценцирање во следните 10 години.