Г20 ДРЖАВИТЕ ОСТАНАА ПОДЕЛЕНИ околу оданочувањето на супербогатите

Најголемите 20 економии во светот не успејаа да се договорат околу оданочувањето на најбогатите во светот на самитот на министрите за финансии на Г20 државите, што заврши во бразилскиот град Рио де Жанеиро. Министрите за финансии од земјите на Г20 се согласија да работат на ефективно оданочување на супербогатите, се вели во изјавата усвоена во петокот по состанокот.

Трнливата тема за справување со милијардерите кои затајуваат данок доминираше на дводневниот состанок во бразилскиот град, кој ќе биде домаќин на следниот самит на Г20 во ноември.

Бразилскиот министер за финансии Фернандо Хадад рече дека „од морална гледна точка е важно дваесетте најбогати нации да сметаат дека имаме проблем, а тоа е да имаме прогресивно оданочување на сиромашните, а не на богатите“.

Соединетите држави и Германија ја отфрлија потребата од глобален договор за оданочување на милијардерите, иницијатива која е поддржана од Франција, Шпанија, Јужна Африка, Колумбија и Африканската унија.

„Со целосно почитување на даночниот суверенитет, ќе настојуваме да се ангажираме во соработка за да се осигураме дека поединците со ултра висока нето вредност се ефективно оданочени“, се вели во соопштението.

„Нееднаквостите во богатството и приходите го поткопуваат економскиот раст и социјалната кохезија и ја влошуваат социјалната ранливост“, се додава.

Директорката на Меѓународниот монетарен фонд Кристалина Георгиева го поздрави ставот на Г-20 за „даночна правичност“, нарекувајќи ја одлуката за соработка за оданочување на ултрабогатите „навремена и добредојдена“.

Кој стои зад иницијативата? Иницијативата е клучен приоритет за бразилскиот претседател Луис Инасио Лула да Силва, кој оваа година претседава со групацијата на најголемите светски економии.

Лула се надеваше на минимален данок од 2 отсто за богатата елита, но конечната декларација претставува компромис за прашањето што ги подели земјите-членки.

Според извештајот на францускиот економист Габриел Зукман, нарачан од Бразил, милијардерите во моментов плаќаат даноци во еквивалент на 0,3% од своето богатство.

Данокот од 2% ќе собере помеѓу 200 милијарди долари и 250 милијарди долари годишно на глобално ниво од околу 3.000 поединци. Парите би можеле да ги финансираат јавните услуги како што се образованието и здравствената заштита, како и борбата против климатските промени, се вели во извештајот.