Франшизата како атрактивен начин за започнување на сопствен бизнис

Франшизата претставува начин на кој може да се започне сопствен бизнис кој станува особено популарен во последно време заради поголемата сигурност во работењето што ја нуди како и заради фактот дека кога се купува франшиза новата компанија станува дел од голема организација со сите предности и поволности што доаѓаат со неа.

Во деловниот свет, франшизата се дефинира како формален однос воспоставен помеѓу франшизантот (купувачот) и франшизерот (продавачот), каде франшизерот му дозволува на франшизантот да го продава неговиот производ или услуга, му дозволува да започне со работа под дадено име и му дава насоки, врши обуки и го запознава со производствени и маркетинг-техники поврзани со производот или услугата.

Како и сѐ друго, и франшизата има свои позитивни и негативни страни.

Така, како позитивни страни на користењето франшиза за започнување со сопствен бизнис се:

• Поголема сигурност во работењето;
• Користење на поволности и предности со станувањето дел од една голема организација;
• Поголема мотивација;
• Обезбеден производ или услуга, реклама, имиџ, лого, препознатливост и репутација.

Од друга страна, пак, како негативни страни на франшизата може да се наведат:

• Недостиг на автономија во работењето;
• Следење на одредени процедури, стандарди и техники за производот или услугата кои се во сопственост на франшизерот;
• Франшизерот го дефинира начинот на кој ќе се спроведува бизнисот, ги одредува цените, квалитетот и карактерот на производите или услугите што ќе се нудат од страна на франшизантот.

Франшизантот кој е купувач на франшизата, на франшизерот (продавачот) му плаќа одреден износ како надомест од продажбата на неговиот производ или услуга или плаќа тантиема (учество во добивката) за користењето на франшизата.

Франшизата е атрактивен начин за започнување со сопствен бизнис кој ја ограничува слободата на франшизантот во однос на неговото работење, но затоа нуди сигурност, мотивација во работењето, препознатлив бренд и станување дел од една голема организација што со себе носи одредени придобивки и поволности.

Сепак, кон франшизата треба да се пристапи особено внимателно, да се разгледаат сите придобивки, ризици, сите клаузули во договорот за франшиза добро да се разберат и да се направат напори да се добијат што подетални и поисцрпни информации со цел да се добијат добри основи за носење на квалитетни деловни одлуки.