ЕУ ЈА КРЕНА РАМПАТА ЗА ТРГОВСКИОТ ДОГОВОР СО САД и намалување на огромните царини што ги најави Трамп

Европската Унија постигна привремен договор за спроведување на трговски договор со САД. Тој вклучува заштитен механизам што ќе му овозможи на Брисел да ги суспендира намалувањата на тарифите во случај увозот од САД да ѝ наштети на европската индустрија.

Претседателката на Европската комисија, Урсула фон дер Лајен, во среда го поздрави привремениот договор за законодавство за укинување на увозните давачки за американските стоки и ги повика ко-законодавците брзо да дејствуваат за да го финализираат процесот.

„Денес, претседателството на Советот и Европскиот парламент постигнаа привремен договор за два регулативи насочени кон спроведување на аспектите поврзани со тарифите од Заедничката изјава на ЕУ и САД, договорена на 21 август 2025 година“, соопшти Европската Комисија.

Претседателот Доналд Трамп изјави дека ќе ѝ даде на ЕУ рок до 4 јули да го ратификува трговскиот договор со Вашингтон, заканувајќи се дека ќе ги зголеми тарифите на „многу повисоки“ нивоа доколку не го стори тоа.

Пратениците на ЕУ го поздравија пробивот по повеќе од пет часа разговори преку ноќ, велејќи дека тоа веројатно го отвора патот за блокот од 27 земји да ја избегне заканата од американскиот претседател Доналд Трамп дека ќе казни понатамошно одложување со повисоки царини.

Договорот вклучува механизам за заштита што ќе му овозможи на Брисел да ги суспендира намалувањата на царините во случај увозот од САД да ѝ наштети на европската индустрија.

Исто така, ѝ овозможува на Европската комисија, извршната власт на ЕУ, да ги суспендира царинските преференции ако САД продолжат да применуваат царинска стапка поголема од 15% за дериватите од челик и алуминиум од ЕУ до крајот на 2026 година.

Привремениот договор доаѓа речиси една година откако ЕУ и САД првпат постигнаа трговски договор во голф-центарот на Трамп во Тарнбери, Шкотска. Според условите на договорот, ЕУ се согласи да ги укине царините за американските индустриски стоки, додека администрацијата на Трамп се согласи да ги ограничи царините за повеќето европски стоки на 15%.

„Договорот е договор, а ЕУ ги почитува своите обврски“, изјави фон дер Лајен од ЕУ во среда преку X. „Заедно, можеме да обезбедиме стабилна, предвидлива, избалансирана и меѓусебно корисна трансатлантска трговија“.