ДУРОВ ПРОГОВОРИ ЗА ПРВПАТ ПО АПСЕЊЕТО: Тој ги отфрли обвинувањата од Франција

Во својата прва јавна изјава откако беше приведен, oсновачот и извршен директор на Телеграм, Павел Дуров, ги негираше тврдењата дека Телеграм е „некој вид анархичен рај“ како „апсолутно невистинити“.

Тој го прекина молкот по осум дена откако беше обвинет од француските власти.

„Доколку некоја земја е незадоволна од интернет услугата, востановената практика е да започне правна постапка против самата услуга. Користењето на законите од ерата пред паметните телефони за да се обвини извршен директор за злосторства извршени од трети страни на платформата со која управува е погрешен пристап. “, напиша Дуров на Телеграм.

„Градењето технологија е доволно тешко како што е. Ниту еден иноватор никогаш нема да изгради нови алатки ако знае дека може лично да биде одговорен за потенцијална злоупотреба на тие алатки“, додаде тој.

Додека рускиот технолошки милијардер призна дека Телеграм не е „совршен“, тој тврди дека компанијата симнала милиони објави и е зафатена со поправање протоколи за да ја направи платформата „побезбедна и посилна“.

Телеграм дозволува групи до 200.000 членови, за кои критичарите тврдат дека го олеснува ширењето на дезинформациите и на корисниците да споделуваат заговорнички, неонацистички, педофилски или терористички содржини.

Неодамна во Обединетото Кралство, апликацијата беше прегледана за хостирање на екстремно десничарски канали кои беа инструментални за организирање насилни нереди во англиските градови минатиот месец.

Телеграм навистина отстрани некои групи, но експертите за сајбер-безбедност велат дека во целина неговиот систем на модерирање на екстремистичка и нелегална содржина е значително послаб од оној на другите компании за социјални медиуми и апликации за пораки.