Долгот зголемен за 60 милиони евра – власта издаде нова државна обврзница

На берзата котира нова државна обврзница. На домашниот пазар државата се задолжува со дополнителни 59,8 милиони евра. Парите треба да се вратат по три години, со камата од 3,95 проценти.

„Ве известуваме дека согласно поднесено барање од страна на Министерството за финансии на Република Северна Македонија за котација на државни обврзници, почнувајќи од 12.12.2024 година на Официјалниот пазар на подсегментот Берзанска котација ќе бидат примени на котација државните обврзници…“, пишува во известувањето од Македонска берза.

Се работи за државни обврзници без девизна клаузула, а вредноста на емисијата е 3.680.000.000 денари. Издадени се 368.000 вакви хартии од вредност, по номинална цена од 10.000 денари.

Последнава државна обврзница е тригодишна. Од страна на ресорното Министерство е издадена на 28 ноември, па раздолжувањето со кредиторите ќе следи на истиот датум во 2027 година.