До потврди за царински долг со еден клик – Се намалуваат бирократските процедури

Хартиените потврди за царински долг, потребни за упис и промени на правните субјекти во Централниот регистар, стануваат минато. Централниот регистар, електронски – со само еден клик, ги добива овие податоци од Царинската управа во реално време. За фирмите и граѓаните тоа претставува заштеда на време и на ресурси.

„Истовремено на овој начин овозможуваме безбедност, интегритет и точност на обезбедените податоци, со што делуваме во насока на сузбивање на можни измами“, потенцира директорот на Царинската управа, Бобан Николовски, на заедничката прес-конференција со директорката на Централен регистар, Анита Стамнова.

Од седум до девет илјади хартиени потврди за царински долг е досегашниот годишен просек на нивно издавање. За обработката на секое барање биле потребни пет до десет дена. Притоа, граѓаните морале лично да ја вршат таа работа или да ангажираат адвокати, што значи и дополнителен административен товар.

„Со овој чекор јасно покажуваме заложби за создавање подобри услови за водење бизнис, преку намалување на бирократските процедури и зголемување на ефикасноста на администрацијата. Бизнисот нема време за чекање, а ние како институции сме должни да покажеме напори за создавање одржливо општество во кое економскиот раст ќе биде движен од зголемена ефикасност и доверба во системот“, вели Николовски.

Стамнова посочи дека е завршена првата фаза од проектот за надградба на Едношалтерскиот систем, со што доказите за платени царински давачки се добиваат автоматски по службена должност при упис на промени, како пренос на удел:

„Централниот регистар и Царинската управа остануваат посветени на трансформација на услугите со фокус на корисниците, користејќи модерни дигитални технологии за поедноставни и поефикасни услуги. Продолжуваме да развиваме електронски услуги и ги охрабруваме сите чинители во јавниот сектор да соработуваат за создавање функционален систем на јавни услуги и враќање на довербата во институциите“.

Според Стамнова, во земјава се активни околу 80 илјади компании. Воедно, за 40 насто е зголемен бројот на субјектите што електронски поднесуваат сметки.

„Евидентен е интересот кај бизнисот за дигитализирано, електронско работење“, нагласи директорката на Централниот регистар.