Дигитално уметничко дело е продадено за скоро 70 милиони долари

Дигиталното дело на американскиот уметник Beeple се продаде во аукциската куќа Кристи во четвртокот за 69,3 милиони долари.

„Секојдневие: Првите 5.000 дена“, пакет цртежи и анимации создадени 5.000 дена по ред, го рангира Мајк Винкелман, како што е вистинското име на Beeple, меѓу тројцата светски уметници чија уметност постигнува највисока цена во текот на животот, без оглед на типот на медиум.

Мајк Винкелман (39) беше познат по своите дигитални проекти и соработки, но до крајот на 2020 година, тој не продаде ниту едно дело под свое име.

Аукцијата што се одржа во четвртокот сведочи за подемот на новата технологија за проверка која применува „блокчејн“ што се користи за криптовалути и се претставува како чудесно решение за копирање, една од сопирачките за развојот на дигиталната уметност.

Делата на Бипл се продаваат како NFT. Тоа е нов, но огромен пазар. Во последните три години се потрошени 174 милиони долари за NFT.