ДПИ: Прекршени девет закони, напишани 280 налози за казни од речиси 90 илјади евра

Во спроведени повеќе од 720 контроли во период од 14 дена, пазарните инспектори напишале казни во износ од речиси 90 илјади евра.

Податоците од Државниот пазарен инспекторат се од извршените надзори насекаде низ државата од 12 до 25 минатиот месец. Притоа, инспекторите констатирале неправилности, за кои се издадени повеќе од 280 прекршочни платни налози во вредност од над 5.500.000 денари. Утврдени се прекршувања на законите за трговија, за финансиска дисциплина, за заштита од пушење, за угостителска дејност, за туристичка дејност, за забрана и спречување на вршење нерегистрирана дејност, за заштита на потрошувачи, за општа безбедност на производите и за енергетика.

Од ДПИ ги информираат економските субјекти за можноста да ги платат прекшочните платни налози или да го остварат правото, доколку имаат забелешка, во судска постапка. Инспекторите кои констатирале прекршок ќе се појавуваат на судските рочишта во својство на сведоци.

Инспекторите и понатаму се на терен, во редовни и вонредни надзори и контроли.