Декемвриски берзански контрасти: ФЗЦ 11 Октомври со раст од 99,5 %, Либерти со пад од 40 %
Маја Анастасова2 мин читање
За еден месец е речиси двојно повисока просечната вредност на акцијата издадена од ФЗЦ 11 Октомври Куманово. Со зголемувањето од 99,5 насто ја предводи берзанската листа на акции што во декември забележале најголем раст. Цената достигнала 399 денари, додека во ноември била на нивото од 200 денари.
Продолжува да расте вредноста на акцијата од ВВ Тиквеш Кавадарци. Месечната разлика е плус 45,77 насто – од 6.600 на 9.621 денар. Во ноември, пак, оваа акција беше рангирана на четвртото место (+1,54 %).
Растот од 20,52 насто ѝ ја обезбеди третата позиција на АЛТА банка Битола (поранешна Стопанска банка Битола). На 30 ноември имала просечна цена од 3.134, а на 30 декември 3.777 денари.
Од четвртото место на негативната во ноември, во декември се префрли на четвртото место на позитивната листа. Кај акцијата на ТТК Банка е регистрирана месечна промена од 5,63 насто. Од 1.562 на 1.650 денари.
Оваа листа се заокружува со акцијата на УНИ Банка, која зајакнала за 4,21 насто. Просечната вредност е 7.400 денари, за разлика од ноемвриските 7.101 денар.
Листата со најголем пад ја отвора Либерти. Цената за акција од 10 се намалила на 6 денари. Тоа движење е означено со минус 40 проценти.
И акцијата на Раде Кончар ја смени листата. Во ноември беше на врвот со најголемиот раст (+22,92 %), а веќе во декември е втора со падот од 15,25 отсто. Просечната вредност од 2.950 се намалила на 2.500 денари.
За седум денари е пониска цената на акцијата со знакот на Макстил. На последниот ден од ноември вредела 135 денари, а на 31 декември 128,04 денари. Разликата е претставена со минус 5,16 проценти.
Акцијата на Стопанска банка Скопје бележи негативно движење од 3,64 отсто, или од 2.720,71 на 2.621,60 денари. Во ноември беше на истава листа, но на последното место (-2,62 %).
Исто така, и акцијата на Фустеларко Борец Битола се задржа на негативната листа. Овојпат со падот од 3,57 отсто, при што цената од 2.800 се спушти на 2.700 денари. Еден месец претходно беше првопозиционирана (-12,53 %).