„Чезакомерц“ купува, „М.Г. Фешн“ продава акции на „Македонијатурист“

Со купените 56 акции, „Чезакомерц“ ги засилува сопственичките позиции во „Македонијатурист“, кои засега се изразени со 6,22 проценти. А, компанијата која минатиот месец се појави меѓу акционерите – „М.Г. Фешн“, почна да продава акции.

„Согласно член 38 став 2 од Правилата за котација на Македонска Берза АД Скопје, известуваме дека акционерот Друштво за внатрешен и надворешен промет Чезакомерц Симеон Роберто и Виктор доо Скопје купи дополнителни 56 акции и сега поседува 28.158 акции односно 6,22% од вкупниот број обични акции издадени од Македонијатурист АД“, се вели во првата објава на Македонска берза.

Во ноември, М.Г.Фешн купи пакет кој му обезбеди 7,69 проценти од акциите на „Македонијатурист“. Тогаш се реализираа девет блок трансакции вредни над пет милиони евра. Сепак, последнава информација не содржи податок за тоа колкав е процентот на сопственоста по извршената продажба.

„…Известуваме дека акционерот Друштво за трговија, производство и услуги М.Г. Фешн доо увоз-извоз Скопје продаде 15.000 обични акции издадени од Македонијатурист АД“, пишува во известувањето од хотелско-угостителската компанија.