Цената на водата за наводнување ќе се одржува со пловечки фотоволтаици – Грант од Шпанија за изработка на техничка студија

Со грант од 765.158 евра за подготовка на техничка студија, Националната мрежа за наводнување на земјоделски површини ќе добие фотоволтаици кои ќе пловат по водите и ќе обезбедуваат електрична енергија за АД „Водостопанство“. Реализацијата на активностите е поделен во неколку фази. Првата предвидува идентификување локации за поставување на пловечки фотоволтаични постројки, втората опфаќа развој на концептен дизајн и физибилити студија, а третата – подготовка на предлог проекти за поставување на пловечки фотоволтаични постројки.

Проектот е со поддршка на амбасадата на Шпанија во Македонија, а шпанската компанија „Глобалтек“ во период од десет месеци треба да го направи концептниот дизајн и физибилити студијата. Во присуство на амбасадорот на Кралството Шпанија, Хозе Луис Лозано Гарсија, Договорот го потпишаа министерот за земјоделство Љупчо Николовски и Хавиер Валеро од  „Глобалтек“.

Наводнувањето е една од клучните заложби на Министерството, укажа министерот Николовски, нагласувајќи дека ова е прв ваков проект во државата, а можеби и во регионот. Притоа, посочи дека Шпанија и Белгија имаат големо искуство со пловечките фотоволтаици. А, парите се од Европскиот план за закрепнување, трансформација и отпорност, поддржани од Министерството за индустрија, трговија и туризам на Шпанија.

Целта е да му се помогне на земјоделството и на овој начин треба да се задржи цената за водните услуги што сега ја плаќаат земјоделците. Значајно е и тоа што панелите на вода не зафаќаат плодно земјиште.