Битиќи во „Лабараториум“: Иновативност и креативност за развој со додадена вредност

Развојот на креативните индустрии генерира нови идеи, производи и услуги, кои ја развиваат културата на иновации, и добива се понагласено значење за регионалната и глобалната конкуретност на домашната економија. Оваа оценка произлезе при посетата на вицепремиерот Фатмир Битиќи на „Лабараториум“, компанија од делот на креативната индустрија, која во центарот на градот има простор наменет за развој на култура на иновации и креативност.

Притоа, сопствениците Дејан Милевски и Владимир Митрески го запознаа Битиќи си бизнис моделот базиран на иновативност и развој на креативноста и културното изразување.

„Ме радува тоа што младите добиваат ваков простор, кој создава можност за следните генерации, својата креативност да ја насочат во оваа индустрија која е во подем во светот и да создаваат додадена економска вредност овде во Северна Македонија“, рече вицепремиерот.

Како што нагласи, културните и креативните индустрии за првпат од осамостојувањето се опфатени со кохерентна стратешка рамка на културните и економските политики во Националната стратегија за развој на културата (2023-2027), која е во финална фаза на изработка, каде што се поставени во една од трите приоритетни области.

„Со ова правиме системски исчекор кон нивно разбирање не само од аспект на творечка и уметничка вредност, туку и од аспект на економскиот ефект кој може да го имаат во општеството“, рече вицепремиерот.